فرفشة ثورية ت

2012-03-29

هذه وظيفة تدوينية لمن يحب أن يشاركنا ببعض المواقف الطريفة والذكريات المضحكة التي حدثت معه خلال عامٍ من الثورة.
اقترحت الفكرة المدوِنة هبة ، على اعتبار أننا ـ معشر المدونين السوريين ـ لم نتناقل مثل هذه الوظائف منذ فترة طويلة، ثم كان اقتراحي بأن يكون موضوع الوظيفة طرائفي!
لن نضع هنا اية أسئلة .. فقط مجموعة من التلميحات التي قد تلهمكم وتذكركم بمواقف جديرة بالذكر
توقف لحظات .. اضحك وضحكنا معك .. ثم تابع النضال ت
وهنا بعض ما مررت به ..

# سلبة ناجحة على رجل أمن أو شبيح نفدتك منهن بأعجوبة
بقيت مدري كام شهر اتحرك بدون مايكون معي هوية، كنت حس انو اذا انمسكت بدون هوية احسن!!
ما علينا
مرة كنت انا ورفيقي راجعين مدري وين .. كان الوقت متأخر، يمكن المغرب
اخ .. واذ بوقف حاجز طيار سيارة الاجرة اللي كنا فيها
– الهويات
رفيقي بيعرف اني ما معي هويتي .. لهيك زتلي بطاقتو الجامعية لورا
عنصر الامن شاف هوية رفيقي النظامية .. بعدين وقف ع شباكي وشاف هوية رفيقي الجامعية : طبعا نفس الاسم والصورة !!!
الجحش ما انتبه انو البطاقتين لنفس الشخص، او يمكن ما بيعرف يقرا متل العادة !!

# أكبر كذبة على أهلك (صدقوها ؟ )
هلأ الكذب على الاهل بعصر الثورة ما في اكتر منو، بس احلى شي اول كذبة، رجعت من اول مظاهرة الي وصوتي مبحوح، عرقان، وعم الهت ..
فتت ع البيت :
– ليش تأخرت؟
– عم اتمشى مع رفقاتي ، قلت الطقس حلو
– ليش عم تلهت؟
– طلعت بسرعة ع الدرج (ت)
– ليش عرقان؟
– شوب … ياخ شو شوب
– طيب صوتك ليش مبحوح ؟
– ييييييه .. مبارح المسا أكلت صندويشة شيش، كان الحر فيها كتير، حلقي مجروح
(مدري شلون مشيت! ^_^)

# هتاف منحبكجي بالغلط بشي مظاهرة :
ياخ .. ههههههههه
هاي مرة باول الثورة، طلعنا مظاهرة بالحارة .. كان عددنا قليل
شوي .. سكتو الشباب، رحت انا عليت صوتي وصرخت : الله سوريا بشار وبس
يا الهي على هديك الخجلي .. واحد من الشباب صرخ : مخبر يا شباب مخبر
اطلعت هيك واذ رفيقي .. والشباب صاروا يضحكوا ت

# أكتر لافتة طريفة قريتها :
لما طلع الشيخ انس سويد حكا عن قصتو مع البطة، وانو خالتو عاتبتو وقت عزل عاطف نجيب، تاني جمعة قريت لافتة عنا بالحارة : دخلك شو رأي خالتك بالحظر الجوي ؟ ت

# تم تفتيش حقيبتك وإنت معك أدوات إندساس (بخاخات مثلاً ) والله نجاك :
مرة فتت ع الجامعة وكان معي بالشنتة كتاب ‘سوريا مزرعة الاسد’ … الجحش مخمل انو الممنوعات ما بتصير كتب … نفدنا ت

# الشبيح الاعلامي المفضل عندك (سوبر شبيح ) :
بشار الاسد ! الملقب بالبطة

# كلمة سمعتها من شبيح اعلامي وفقعت الضحك
هاد بشار كان واقف مرة عم يلعي .. قام قال : انو شوفو شوفو … هاي اخلاق ثوار، الثوار ما بيسرقوا ما بخربوا ما كذا … لو كانوا ثوار .. ولو كانت ثورة حقيقية كنت انا اول واحد انضميت الها وبقية الشعب
(يعني يا فهمان اذا انت وبقية الشعب صرتو مع الثورة ، لكان الثورة ضد مين ؟!!!)

حماقة ارتكبتها أو كم مرتب أكلتو ..

هوووو … هدول مافي اكتر منون … بطلع من البيت بدون هوية وخود دبرها ..
بطلع من المكتبة ومعي كياس فيون لافتات ومنشورات …. بوقف اول تكسي بتمر
بيقعد شوفير التكسي بيحكي عن المؤامرة الكونية على سوريا … واحلى شي اني بفوت معو بحوار وطني شامل ^_^ والله بخاف شي مرة يزتني بشي فرع.

الى صبا قلبي


comments powered by Disqus